Улаанбаатар хотын музейгээс санаачлан Швейцарийн хөгжлийн агентлагийн дэмжлэгтэйгээр “Өнгөрснийг ирээдүйтэй уулзуулах нь” төслийг эхлүүлэхээр боллоо. Уг төсөл нь Улаанбаатар хотын нутаг дэвсгэр дэх түүх, соёлын үл хөдлөх дурсгалын мэдээллийг олон нийтэд ил тод мэдээлэх, үүгээрээ дамжуулан үл хөдлөх, дурсгалын үнэ цэнийг мэдрүүлэх, хайрлан хамгаалах санаачлагыг хүргэж байгаа юм. Төслийн үр дүнг www.ubheritage.mn цахим хуудсаар авах болно.
Тамхигүй орчин
Улаанбаатар хотын музей
“Тамхины ишгүй байгууллага-Тамхигүй орчин”
Тамхины талаарх мэдээллийг харах
УЛААНБААТАР ХОТЫН ТҮҮХИЙН ХӨТӨЧ БОЛСОН “УЛААНБААТАР ХОТЫН ТОЙРОН АЯЛАЛ” НОМ ХЭВЛЭГДЛЭЭ.
УЛААНБААТАР ХОТЫН ТҮҮХИЙН ХӨТӨЧ БОЛСОН “УЛААНБААТАР ХОТЫН ТОЙРОН АЯЛАЛ” НОМ ХЭВЛЭГДЛЭЭ.
Улаанбаатар хотын музейгээс А.Цэрэнчулууны “Улаанбаатар хотын тойрон аялал” номыг шинэчлэн баяжуулж, эрхлэн хэвлүүлэв. Энэ ном нь Монгол Улсын нийслэл Улаанбаатар хотын хөгжлийн түүхийг энгийн, товч тодорхой, сонирхолтой байдлаар харуулахыг зорьсон гарын авлага, хотын түүхийн хөтөч болсон бүтээл юм. Энэ ном анх 2006 онд уншигчдын гар дээр очсоноос хойш өдгөө дөрөв дэх удаагаа шинэчлэгдэн хэвлэгдэж байна.
Энэ удаа уг номыг шинэчлэн баяжуулснаар номын бүтэц, агуулга, нэр томъёо, Улаанбаатар хотын түүхийн гол ойлголтууд шинэчлэгдэн засварлагдаж, түүхэн ховор гэрэл зургуудаар баяжигдсан.
Тус номын агуулга нь дараах 13 хэсгээс бүрдэнэ.
- Улаанбаатар хотын газарзүйн байршил, цаг агаар
- Өнөөгийн Улаанбаатар хотын үүсэл, хөгжил
- Улаанбаатар хотод ирж байсан гадаадын алдартай хүмүүс
- Өөрчлөгдөн хөгжиж буй Улаанбаатар хот
- Улаанбаатар хотын тойрон аяллын тайлбарлах газрууд
- Улаанбаатар хотын сүм хийд, байшин барилгын хөгжил
- Дурсгалт сүм хийд, байшин барилгууд
- Улаанбаатар хот дахь эртний дурсгалууд хийгээд орчин үеийн хөшөө дурсгал, баримлууд
- Хаана юу байсан бэ?
- Улаанбаатар хотод заавал очиж үзэх түүх, соёлын дурсгалт хийгээд амралт чөлөөт цаг, спортын орчин үеийн цогцолбор 10 газар
- Нийслэл дэх музейнүүд
- Хэзээ, хаана, юу болсон бэ?
- Монголын нийслэлийн холбогдолтой үйл явдлын он цагийн хэлхээс зэрэг хотын анх үүссэнээс одоог хүртэлх хөгжлийн түүх, түүнийг хялбаршуулсан мэдээлэл багтсан.
Номын 1-13 бүлэгт хотын архиктурын дурсгал, бүтээн байгуулалт, гудамж, талбай, хотын хуучны болон одоогийн ерөнхий төрх, хотын хүмүүсийг харуулсан 322 гэрэл зураг, хууч яриа, домог, товч намтар, статистик мэдээ зэрэг 57 шигтгээ, Улаанбаатар хотын тойрон аяллын 11 газрыг тайлбарласан 60 обектын мэдээлэл, томоохон 6 сүм хийд, хуучны болон орчин үеийн 70 гаруй барилга, байшин, 115 хөшөө, баримал, 40 гаруй дурсгалт газарт, энэ цаг үеийн Улаанбаатар хотын зорьж үзэх 9 газар зэрэг өргөн мэдээлэл орсон.
Номын агуулгад буй мэдээлэл нь хотын иргэд, ялангуяа хүүхэд, залууст нийслэлээ таних мэдэх, гаднын жуулчдад Улаанбаатар хотын хөгжлийн түүхийг сурталчлан таниулахад хөтөч болж, түүх, соёлоо дээдэлдэг хотын иргэнийг төлөвшүүлэхэд хувь нэмэр оруулна гэж найдаж байна.
Уг номыг Улаанбаатар хотын музей, болон Интерном, Мир номын дэлгүүрээс авах боломжтой.
“УЛААНБААТАР: 1983-2016” гэрэл зургийн үзэсгэлэн
Улаанбаатар хотын 378 жилийн ойд зориулан Японы гэрэл зурагчин Сүгияама Тэрүзогийн “Улаанбаатар 1983-2016” гэрэл зургийн үзэсгэлэнг толилуулж байна. Үзэсгэлэнд 58 гэрэл зураг тавигдсан ба үзэсгэлэн 2017.10.24-12.01 хүртэл үргэлжилнэ. Үзэсгэлэнгээс Социалист болон Ардчилсан нийгмийн үеийн Улаанбаатар хотын сонирхолтой гэрэл зургуудыг үзэх боломжтой.
“1909-1911 оны МОНГОЛЧУУД” гэрэл зургийн үзэсгэлэн
ФРАНЦЫН СУДЛААЧ БҮИАН ДЕ ЛАКОСТИЙН ДУРАНД БУУСАН 1909-1911 оны МОНГОЛЧУУД гэрэл зургийн үзэсгэлэн
2016.11.16 – 2017-01.31 өдрүүдэд Улаанбаатар хотын музейн үзэсгэлэнгийн танхимд гарна.
Үзэсгэлэнгийн тухай
Түүний үр, ач нарын нэг Францын хөгжмийн зохиолч Бернард Форт Улаанбаатар дахь Аллианс Франсез буюу Монгол-Францын төвийн захирал Лора Николовтой 2010 онд Францад танилцахдаа түүний аяллын тэмдэглэл, зургуудыг үзэсгэлэн байдлаар гаргаж, Монголчуудад дэлгэх хүсэлтэй байдгаа илэрхийлсэн юм. Ингээд энэхүү үзэсгэлэнг Монгол-Францын төвөөс Боловсрол, соёл, шинжлэх ухааны яам, Улсын Филармони, 976 арт галерей, Францын OTASIE байгууллага, Парис 7 их сургуулийн Анна Каиоззо болон Лиа Макадре нарын тусламж, дэмжлэгтэйгээр 2016 оны 7 дугаар сард Улсын филармоны байранд анх гаргасан юм.
Францын Үндэсний номын сангийн эзэмшилд байдаг эдгээр гэрэл зураг, аяллын тэмдэглэл 2015 оны 12-р сард Төв Азийн өв соёлын хурал дээр танилцуулагджээ. Эдгээр зургууд нь Монголын өв соёлын судалгааны томоохон ажлын нэгэн хэсэг юм. (Анна Каиоззо нь энэхүү судалгааны ажлыг эхлүүлсэн бөгөөд Лиа Макадрегийн докторын ажлын сэдэв юм.)
Энэхүү үзэсгэлэн нь бидэнд XX зууны эхэн үеийн Монголчуудын амьдралыг Франц судлаачийн өнцгөөс харах боломжийг нээж өгч байгаа билээ. Гэрэл зургуудыг шаардлага хангахуйц форматтай гаргах үүднээс гэрэл зурагчин Кристиан Варлет дижитал хувилбарт оруулан чанарыг нь сайжруулсан. Мөн энэхүү үзэсгэлэнд тавигдсан зарим гэрэл зургууд дээрх газрууд болох Улиастай, Хар Балгас зэрэг газарт бид зочлон одоо байгаа байдлынх нь өнгөт гэрэл зургийг авч харьцуулсан байдлаар оруулсан байгаа. Бүиан де Лакостийн зочилж байсан газруудын нэршил нь цаг хугацааны туршид өөрчлөгдсөөр зарим нь тэс ондоо нэртэй болсон учраас зургуудын нэршлийг түүний тэмдэглэсэн байдлаар болон одоогийн харьцуулсантай нь оруулсан болно. Хаалтан дотор тусгайлан оруулсан газруудын нэршил нь Франц дахь Монгол, Сибир судлалын төвийн тогтоосон нэршлүүд юм. Гэрэл зураг бүр тайлбар, байршилтай байгаа.
“БИ ХОТЫН ИРГЭН” боловсролын ажил
Олон улсын музейн өдрийг угтаж Улаанбаатар хотын музейгээс Монголын цаасан урлалын холбоо, City Tour ХХК-тай хамтран “Би хотын иргэн” сэдэвт боловсролын ажлыг 2016 оны 05 сарын 14-нд амжилттай зохион байгууллаа.
Боловсролын ажлыг дараах 3 үе шаттай хэрэгжүүлсэн. Үүнд:
1-р үе шат: Хотын түүхийн талаар presentation бэлдэн үзүүлж, өнгөрсөн ба одоогийн байдлыг харьцуулан ярилцсан.
2-р үе шат: Улаанбаатар хотын музейгээр аялсан.
3-р үе шат: Хотын түүхтэй холбогдсон дараах танин мэдэхүйн хөтөлбөр хэрэгжүүлсэн. Үүнд:
– Усан дээр “Миний хот” сэдэвт зураг зурах
– Улаанбаатар хотын үл хөдлөх дурсгалуудаас сонгон цаасаар урлах
– Одоогоос 100 жилийн өмнөх язгууртан ноён, хатны хувцаслалт, чимэг зүүлтийг урьдчилан бэлтгэсэн хэвлэмэл үзүүлэн ашиглан тэдний дүрд хувирах зэрэг ажил хэрэгжүүлж өөрсдийн зурсан зургийг болон цаасан урлалын холбооноос олгосон номны хавчуурга, эбру урлал болон керамик урлалын зүйлсийг гарын бэлэг болгон идэвхитэй, анги хамт олноо манлайлан оролцсон сурагчдад төлөөлөл болгон урамшуулсан.
Тус боловсролын ажилд Сонгинохайрхан дүүргийн 76-р сургуулийн II-IV ангийн нийт 130 хүүхэд хамрагдсан.
ЧИНГЭЛТЭЙ ХАЙРХАНЫ ӨВӨРТ гэрэл зургийн үзэсгэлэн
Олон Улсын музейн өдрийг угтаж Чингэлтэй дүүргийн Засаг даргын тамгын газар, Улаанбаатар хотын музей хамтран “Чингэлтэй хайрханы өвөрт” гэрэл зургаар өгүүлсэн түүх үзэсгэлэнг 2016 оны 05 дугаар сарын 16-нд Хүннү Моллын “Гамма галерей”-д нээв.
Үзэсгэлэнд Чингэлтэй дүүргийн нутаг дэвсгэрт 1778 оноос хойш 1924 он хүртэл буюу Хүрээний үед бий болсон худалдааны захууд, түүнийг тойрсон пүүс, дэлгүүр, кино театр болон модны зах, төмрийн зах болон тухайн үеийн Хүрээний байдлыг харьцуулсан зургууд, 1924 оноос 2014 он хүртэл буюу Улаанбаатар хотын үед бий болсон анхны орон сууцны хороолол, Чойбалсангийн талбай, Барилгачдын талбай, Өндөр хоршоо, Монгол банк, Элдэв-Очирын нэрэмжит Хүүхдийн кино теар, анхны Алтай зочид буудал, Монголын үндэсний музей, түүх, соёлын үл хөдлөх дурсгал зэрэг Хүрээнээс Хот болон өргөжсөн түүхийг гэрэл зургаар харьцуулан харуулсан.
Үзэсгэлэнгийн нээлтэд Чингэлтэй дүүргийн Засаг дарга Ганболд, тамгын газрын ажилтнууд, мөн тус дүүргийн ЕБС-ийн захирал, менежерүүд, урилгаар Солонгос улсын Инчион хотын Йонсей дүүргийн Иргэдийн Төлөөлөгчдийн Хурлын дарга, бусад албаны хүмүүс оролцлоо.
Үзэсгэлэн 2016 оны 05 дугаар сарын 26-ныг дуустал үргэлжилнэ.
Улаанбаатар хотын үл хөдлөх дурсгалын тооллогыг 2015 оны 6-р сарын 20-ноос 9-р сарын 20-ны хооронд зохион байгуулна
Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Ажлын хэсэг байгуулж, хөрөнгө гаргах тухай” А/529 дүгээр захирамж гаргалаа. Захирамжийн дагуу Улаанбаатар хотын нутаг дэвсгэр дэх түүх, соёлын үл хөдлөх дурсгалын үзлэг тооллогын ажлыг 2015 оны 06 дугаар сарын 20-ноос 09 дүгээр сарын 20-ны хугацаанд зохион байгуулна. Түүх, соёлын үл хөдлөх дурсгалын үзлэг тооллогын ажлыг зохион байгуулах ажлын хэсгийг баталлаа. Ажлын хэсгийн ахлагчаар нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл ажиллана.
Үзлэг тооллогын ажилд шаардагдах 3 сая 870 мянган төгрөгийг Засаг даргын нөөц хөрөнгөөс гаргахыг нийслэлийн Засаг даргын Тамгын газарт даалгав.Тухайн дүүргийн нутаг дэвсгэрт үзлэг, тооллого хийх багийн унаа, хоолны зардлыг санхүүжүүлэхийг дүүргийн Засаг дарга нарт, Үзлэг тооллогын ажлыг чанартай зохион байгуулж дүнг 2015 оны 09 дүгээр сард багтаан танилцуулахыг Ажлын хэсэгт үүрэг болголоо.
Эх сурвалж: Нийслэлийн Соёл Урлагийн газар
“Нийслэл хүрээ уран зурагт” үзэсгэлэн
Улаанбаатар хотын музейн сан хөмрөг дэх нийтийн хүртээл болж байгаагүй үзмэр болон Урчуудын эвлэлийн хорооны гишүүн, зураач П.Энхтөрийн хамтарсан уран бүтээлийн “Нийслэл хүрээ уран зурагт” үзэсгэлэн 2015 оны 05 дугаар сарын 18-ны өдөр нээлтээ хийлээ. Нээлтийн үйл ажиллагааг Батлан хамгаалах их сургуулийн оюутнуудтай хамтран зохион байгуулав.
Уг үзэсгэлэнг Батлан хамгаалах их сургуулийн оюутнуудад цэргийн ач холбогдлоор нь тайлбарлан таниулах зорилгоор оролцуулсан юм. Үүнд: Монголын өөртөө засах засаглал бүхий Автономит төрийн байдал, 1920 оны эцэс, 1921 оны эхээр Оросын цагаан цэргийн удирдагч Барон Унгерн Нийслэл хүрээнд орж ирсэн, 1921 оны 7 дугаар сард болсон Ардын хувьсгалын түүхэн үйл явдлуудыг харуулсан олон сонирхолтой зургууд тавигдсан үзэсгэлэн байв.
Үзэсгэлэн 2015 оны 05 дугаар сарын 18-наас 6 дугаар сарын 1-ний өдрүүдэд үргэлжилнэ.
Улаанбаатар хоттой танилцах аяллыг зохион байгуулав
Улаанбаатар хотын түүхэн дурсгал, хотын соёлыг залууст таниулах зорилгоор “Улаанбаатар хоттой танилцах аялал”-ыг 2015 оны 5 дугаар сарын 07-ны өдөр Монгол Улсын Боловсролын Их сургуулийн Багшийн сургуультай хамтран зохион байгуулав. Аялалд тус сургуулийн Бага ангийн багшийн 4 дүгээр ангийн 70 оюутан хамрагдаж, Гандангаас Амгалангийн Дарь-Эхийн сүм, Зайсан толгойгоос Дамбадаржаа хийд хүртэлх хотын түүх, архитектурын дурсгалуудтай танилцаж, мөн Улаанбаатар хотыг хэрхэн төлөвлөж ирсэн, хотын иргэн гэсэн ойлголт монголд хэзээнээс бий болсон, яагаад өнөөдөр Улаанбаатар хот шиг байж чадахгүй байгаа, хотын соёл яагаад төлөвшихгүй байгаа гэх зэрэг хот байгуулалт, хотжилт, хотын соёлын тухай асуудлуудтай танилцсан аялал байв.
“Seoul friendship fair 2015” арга хэмжээнд оролцож Улаанбаатар хотыг сурталчлав
Улаанбаатар Сөүл хотын хооронд ах дүүгийн найрамдалт харилцаа тогтоосны 20 жилийн ойн хүрээнд БНСУ-ын Сөүл хотноо “Улаанбаатарын өдөр” арга хэмжээ энэ сарын 1-3-ны өдрүүдэд боллоо. Тус арга хэмжээний үеэр бизнесийн уулзалтууд болон эх орноо сурталчлах урлагийн тоглолт, соёлын яармаг, гэрэл зургийн үзэсгэлэн зохион байгуулагдав. Сөүл хотын захиргааны байранд гарсан “Өнөөдрийн Улаанбаатар” сэдэвт гэрэл зургийн үзэсгэлэнг тус музей болон Нийслэлийн соёл, урлагийн газар, Нийслэлийн аялал жуулалчлалын газраас хариуцан гаргав.
Ялалтад тусалсан монголчуудын талаар үзэсгэлэн гаргана
(эх сурвалж: NEWS.MN)
Эх орны дайны ялалтын 70 жилийн ойн баярыг ирэх тавдугаар сарын 9-ний өдөр Орос орон даяар ёслол төгөлдөр тэмдэглэнэ. Энэхүү баярыг тохиолдуулан Монгол Улсаас ОХУ-ын Эрхүү хотод суугаа Ерөнхий консулын газар, Улаанбаатар хотын музей болон “Гамма” гэрэл зургийн агентлагтай хамтран тавдугаар сарын 5-10-ны өдрүүдэд Эрхүү хотын “Диас” арт галерейд “Ялалтад Монголчууд юугаар туслав” сэдэвт 50 гаруй баримтат гэрэл зургаас бүрдсэн үзэсгэлэн гаргах гэж байна.
Түүнчлэн Монгол Улсын Засгийн газраас гаргасан “Монголын ард түмэн: Бүхнийг фронтод, Бүхнийг ялалтын төлөө” сэдэвт архивын баримт, гэрэл зургийн цомог, мөн “Зовох цагт нөхрийн чанар танигдана” баримтат киног Оросын ард түмэнд толилуулах юм
Ялалтад тусалсан монголчуудын талаар үзэсгэлэн гаргана
(эх сурвалж: NEWS.MN)
Эх орны дайны ялалтын 70 жилийн ойн баярыг ирэх тавдугаар сарын 9-ний өдөр Орос орон даяар ёслол төгөлдөр тэмдэглэнэ. Энэхүү баярыг тохиолдуулан Монгол Улсаас ОХУ-ын Эрхүү хотод суугаа Ерөнхий консулын газар, Улаанбаатар хотын музей болон “Гамма” гэрэл зургийн агентлагтай хамтран тавдугаар сарын 5-10-ны өдрүүдэд Эрхүү хотын “Диас” арт галерейд “Ялалтад Монголчууд юугаар туслав” сэдэвт 50 гаруй баримтат гэрэл зургаас бүрдсэн үзэсгэлэн гаргах гэж байна.
Түүнчлэн Монгол Улсын Засгийн газраас гаргасан “Монголын ард түмэн: Бүхнийг фронтод, Бүхнийг ялалтын төлөө” сэдэвт архивын баримт, гэрэл зургийн цомог, мөн “Зовох цагт нөхрийн чанар танигдана” баримтат киног Оросын ард түмэнд толилуулах юм
Албан хэрэг хөтлөх стандарт
ТӨРИЙН АЛБАН ХЭРЭГ ХӨТЛӨЛТИЙН ЗААВАР БОЛОН БАРИМТ БИЧГИЙН СТАНДАРТЫН ТУХАЙ ҮНДСЭН ОЙЛГОЛТУУД
(дээрх линкээр орж PDF-ээр харна уу.)
Чингэлтэй дүүрэг – Хамтын ажиллагааны гэрээ
Чингэлтэй дүүргийн Засаг дарга Д.Ганболдтой хотын түүх, соёлыг сурталчлах, хадгалж хамгаалах чиглэлээр “Хамтын ажиллагааны гэрээ” байгуулав.
2015 оны 3 дугаар сарын 5-ны өдөр Чингэлтэй дүүргийн Засаг даргатай “Найрсаг Улаанбаатар”, “Хотын иргэн-хотын соёл” хөтөлбөрүүдийг хэрэгжүүлэх хүрээнд “Хамтын ажиллагааны гэрээ” байгуулж, нийслэл хотын түүх, соёлыг хүүхэд, залууст танин мэдүүлэх, түүх, соёлын дурсгалыг хадгалж хамгаалах чиглэлээр хамтран ажиллахаар болов.
Гэрэл зургийн цомог
“Чингэлтэй хайрханы өвөрт” гэрэл зургаар өгүүлсэн түүх номын нээлт болов.
Чингэлтэй дүүргийн Засаг даргын тамгын газартай хамтран “Чингэлтэй хайрханы өвөрт” гэрэл зургаар өгүүлсэн түүх номыг бүтээв. Тус номд 1778 оноос өнөөг хүртэл Чингэлтэй дүүргийн нутаг дэвсгэрт бий болсон онцлох үйл явдал, газар, соёл урлаг, үйлчилгээний байгууллага багтсанаас гадна хотын хөгжлийн явцад тухайн нутаг дэвсгэрт өрнөсөн бүтээн байгуулалт, үйлдвэржилт, барилгажилтыг харьцуулан харуулахыг зорьсон. Тус номд Чингэлтэй дүүргийн холбогдолтой 420 орчим гэрэл зураг орсон бөгөөд нийслэлийн бусад дүүргүүдээс түүхээ гэрэл зургаар баяжуулан олон нийтийн хүртээл болгож буй анхдагч бүтээл болов.
Нийслэл Улаанбаатар хотын 375 жилийн ойд зориулан Улаанбаатар хотын музейгээс зохион байгуулсан ажлын тухай илтгэх хуудас
2014 оны 11 дүгээр сарын 13-ний өдөр, Улаанбаатар хот
Монгол Улсын нийслэл Улаанбаатар хот үүсэн байгуулагдсаны 375 жилийн ойдзориулан НИТХ-ын Тэргүүлэгчдийн 2014 оны 75 дугаар тогтоол, Нийслэлийн Засаг даргын 2014 оны А/520 дугаар захирамжаар батлагдсан ойн арга хэмжээний төлөвлөгөөний дагуу Улаанбаатар хотын музейгээс түүх, соёлоо хадгалж хамгаалах, иргэдийг соён гэгээрүүлэх чиглэлээр дараах ажлуудыг зохион байгуулав. Үүнд:
Нэг. Хүн чулууны хонхороос цор ганц үлдсэн хүн чулуун хөшөөг музейдээ залав.
Хоёр. Улаанбаатар хотын түүхийн гэрч болсон уугуул, суугуул иргэдийн уулзалт зохион байгуулав.
Гурав. Д.Манибадарын “Нийслэл хүрээ” хэмээх хотын түүхийн үнэт өв болсон үзмэрийн хуулбарыг хийж, хадгалж, хамгаалах ажлыг хийв.
Дөрөв. “Улаанбаатар хот гэрэл зурагт” явуулын зургийн үзэсгэлэн зохион байгуулж байна.
Тав.Нийслэлийн Засаг Даргын Тамгын газарт хотын хөгжлийн түүхийг харуулсан гэрэл зургийн үзэсгэлэн гаргав.
Зургаа. “Санкт-Петербургээс Улаанбаатарт буюу нэрт монголч эрдэмтэн П.К.Козловын гэр музейгээс авчирсан гэрэл зургууд” (1896-1936 он) сэдэвт үзэсгэлэн зохион байгуулав.
Илтгэх хуудас бичсэн:
Эрдэм шинжилгээний ажилтан Г.Очбаяр
Улаанбаатар хотод 2015 онд зохиогдох аялал жуулчлал, соёл урлаг, спортын арга хэмжээний хуанли
Нийслэлийн аялал жуулчлалын газраас Улаанбаатар хотод 2015 онд зохиогдох аялал жуулчлал, соёл урлаг, спортын арга хэмжээний хуанлиг гаргасан байна.
Улаанбаатар хотод 2015 онд зохиогдох аялал жуулчлал, соёл урлаг, спортын арга хэмжээний хуанли
| 2 сар | Нүүдэлчдийн өвлийн наадам | |
| 21 | Нийслэлийн цасны баяр өдөрлөг | |
| 24 | “Монгол их цам-108” шашин, соёлын арга хэмжээ | |
| “Сар шинийн гоёл” эртний эдлэлийн үзэсгэлэн яармаг | ||
| 4 сар | 5-6 | “Horeca” зочид буудал, зоогийн газар, зочлох үйлчилгээний байгууллагуудын хангамжийн үзэсгэлэн |
| “Найрсаг Улаанбаатар” зочид буудал, зоогийн газар, зочлох үйлчилгээний салбарын мэргэжлийн аварга шалгаруулах олон улсын тэмцээн | ||
| Хошин урлагийн фестиваль | ||
| 5 сар | “Биеийн тамир, спортыг дэмжих бүх нийтийн өдөр” арга хэмжээ | |
| “Best of Dance” бүжгийн урлагийн цэнгүүн | ||
| “Венийн вальс” үдэшлэг | ||
| “Гэгээн муза” драмын урлагийн шилдгийг шалгаруулах наадам | ||
| “Аялал жуулчлал ба ажил эрхлэлт” хөдөлмөрийн яармаг | ||
| 6 сар | 1 | Хүүхдийн баяр |
| “Мэргэжлийн морин хуурчдын олон улсын уралдаан” | ||
| Дотоодын аялал жуулчлалын “Ulaanbaatour” үзэсгэлэн | ||
| 7 сар | “Silence white” дижи урлагийн шоу үдэшлэг | |
| 10 | Хүй долоон худагт тоглогдох “Учиртай гурван толгой” дуурь | |
| 12 | “Монгол туургатны бүжиг” их наадам | |
| 13 | “Дээлтэй Монгол наадам” үндэсний соёлын арга хэмжээ | |
| “Best of folk art” үндэсний урлагийн тоглолт | ||
| 20 | “Тал нутгийн марафон” олон улсын марафон гүйлтийн тэмцээн | |
| “Best of Classics”сонгодог урлагийн үдшийн цэнгүүн | ||
| “Play time – 2015”амьд хөгжмийн наадам | ||
| 8 сар | Айраг фестивал | |
| 8-9 | “Taste of Ulaanbaatar”олон орны хоолны өдөрлөг | |
| 16-17 | “Best of food”Улаанбаатарын хоолны нэгдсэн фестиваль | |
| “UB Cup”хөлбөмбөгийн цомын тэмцээн | ||
| 9 сар | 27 | “Сэтгэл татам Улаанбаатар” жуулчдын гэрэл зургийн үзэсгэлэн |
| “Best of Book”номын баяр | ||
| “Улаанбаатар – Уран зураг” наадам | ||
| “Улаанбаатар” дугуйн марафон | ||
| 10 сар | “Инээмсэглэлтэй Улаанбаатар” гэрэл зургийн уралдаан | |
| “Их талын жазз” олон улсын жазз хөгжмийн наадам | ||
| “Street art festival” | ||
| “X Games Mongolia” эксрим спортын уралдаан | ||
| “Улаанбаатар” олон улсын кино наадам | ||
| “Спортлог Улаанбаатар” өдөрлөг | ||
| “Дөрвөн хайрхан” спорт явган аялал | ||
| Хүүхдийн найрал дууны уралдаант наадам | ||
| 29 | “UB Art Fair” дүрслэх урлагийн үзэсгэлэн яармаг | |
| 11 сар | “Улаанбаатар – Мөсөн хот” фестиваль | |
| “Авьяаслаг хүүхдүүд” урлагийн их наадам | ||
| 12 сар | “Цөмөөхэй” бүжгэн жүжиг | |
| 15 | Сүлд модны гэрэл асаах ёслол | |
| 31 | “Улаанбаатарын мөнгөн үдэш” цэнгүүн |
2015 онд зохиогдох шашин, соёлын арга хэмжээ
| Хавар | Эхэн сарын шинийн 1-15“Чойнпрүп жон-а” их ерөөл |
| Эхэн сарын шинийн 14Давхар дүйчэн буюу Өндөр гэгээний дүйчэн өдөр | |
| Сүүл сарХаврын их Дүйнхор дүлцэн залах ёслол Майдар эргэх ёслол | |
| Зун | Эхэн сарын шинийн 15Бурхан багшийн их дүйчэн өдөр |
| Сүүл сарын шинийн 4Номын хүрдэн эргүүлсэн өдөр | |
| Сүүл сарын шинийн 15Хайлан хурах | |
| Намар | Сүүл сарын 22Тэнгэрийн орноос буусан их өдөр(Бурхан багш эхийн ачийг хариулаад Замбутивд буусан өдөр) |
| Өвөл | Эхэн сарын 25Зулын хорин тавны билэгт сайн өдөр |
| Нийтийн он тооллын 1-р сарын1Энх тайвны мандал | |
| Сүүл сарын 29Сор залах ёслол | |
| Сүүл сарын 30Цэдэр Лхам эргэх өдөр |
Аялал жуучлалын мэдээлэл, сурталчилгааны төв
Лавлах утас: 7010-8687
Цахим хуудас: tourism.ub.gov.mn
УБ хотын уугуул, суугуул иргэдийн уулзалт боллоо
Монгол Улсын нийслэл Улаанбаатар хотын 375 жилийн ойн хүрээнд “Улаанбаатар хотын уугуул, суугуул иргэдийн уулзалт”-ыг 2014 оны 10 дугаар сарын 17-нд Д.Нацагдоржийн нэрэмжит Улаанбаатар хотын нийтийн төв номын санд зохион байгууллаа. Тус уулзалтын гол зорилго нь Улаанбаатар хотын уугуул, суугуул иргэдийн дурсамжийг авч, “Нийслэлийн дурсамжийн сан”-г баяжуулахад оршино. Тус уулзалтад түүхч, академич Ш.Бира, газарзүйч, профессор О.Сүхбаатар, Улаанбаатар хотын судлаач зураач Г.Дунбүрээ, архитектор Т.Даажав, Я.Шархүү, Ардын жүжигчин Г.Хайдав, Улаанбаатар хотын түүх, соёлын дурсгалууд номын зохиогч Ч.Дүрзээ, аялал жуулчлалын багш, Улаанбаатар хотын тойрон аялал номын зохиогч А.Цэрэнчулуун, АДХ, НИТХ-ийн нарийн бичгийн даргаар ажиллаж байсан Г.Маналжав, хурандаа Ж.Дүүрэнжаргал, нийслэлийн засаг даргын тамгын газрын ахмадын холбооны дарга Л.Ойдовсамбуу хотын унаган иргэн Б.Ганбат гэсэн 12 уугуул, суугуул иргэн оролцлоо.
Дилав хутагт Б.Жамсранжавын үзэсгэлэн
Дилав хутагт Б.Жамсранжавын лагшин мэндэлж, мэлмий гийсэн 131 жилийн ойн өдөр (2014.10.08)
Монголын 12 хутагтын нэг Дилав Хутагт Жамсранжав нь монгол хүн бүрийн бахархал болсон хүн юм. Гэвч ороо бусгаа цагийн аясаар “ЭХ ОРОНЧ “-ийн маань алдар нэр, гавъяа зүтгэл улам бүдгэрсээр байна. Тиймээс жил бүрийн 10-р сарын 8-нд Дилав Хутагт Жамсранжавын үйл хэргийг олон нийтэд таниулах, буяны ном хурах үйл ажиллагааг уламжлал болгон зохион байгуулж байгаа билээ. Энэ жил “Мамба дацан” хийдэд буяны ном хуруулж, “Улаанбаатар хотын музей”-д Дилав Хутагт Жамсранжавын амьдрал, үйл хэрэгтэй холбоотой гэрэл зургийн үзэсгэлэнг зохион байгуулж байна.
Улаанбаатар хотын музейд Дилав хутагт Б.Жамсранжавын үзэсгэлэн
Хугацаа: 2014.10.08-2014.10.14
Зохион байгуулагч байгууллага:
- “АРИГҮМедиа” ХХК
- “Дилав Хутагт Жамсранжав нийгэмлэг” ТББ
- “Улаанбаатар хотын музей”
Дилав хутагт Жамсранжавын цадиг оршвой
Ар халхын 84 шидтэний нэг хэмээн алдаршсан Дилав хутагтын хувилгаан Б.Жамсранжав XV жарны хөх бичин жилийн намрын дунд сарын 15 буюу аргын тооллын 1883 оны 10-р сарын 08-нд тэр үеийн Халхын Засагт хан аймгийн Хотгойдын Цогтой вангийн хошуу, одоогийн Завхан аймгийн Түдэвтэй сумын Ойгон нуур багийн нутаг Ойгон нуурын ар бие Баян айраг уулын энгэр Түшлэгийн булаг гэдэг газар Баашлуугийн 3-р хүү болон мэндэлжээ. Тэрээр Дэмчиг бурханы бүрэлбаа, Дилав хутагтын хувилсан дүр мөн хэмээн тодорч одоогийн Завхан аймгийн Шилүүстэй сумын нутагт оршиж байсан Норванчин хийдэд шавилан суусан байна. 5 настайдаа банди, 7 настайдаа равжун, 21 насандаа гэцэл, 25 насандаа цорж, 29 насандаа самади багш цол тус тус хүртжээ. Тэрээр Ховдын хязгаарын Шар сүмийг тэргүүлж байв. 1923 оноос Улиастайн сайдаар ажиллаж байгаад 1932 оноос Дотоодыг хамгаалах газрын даалгавараар Хятад руу тагнуулын ажлаар гарч улмаар Чан Кай Ши-гийн дэргэд ажиллах болжээ. Тэрээр “Дэслэгч Жамсран” нэрээр тагнуулын мэдээ явуулж байсан нь өдгөө тагнуулын ерөнхий газрын архивт хадгалагдаж байна. Гэвч зүдэг хар цагийн эрхээр тэрээр буруутгагдаж, хувьсгалын эсэргүү нэр зүүн хэлмэгдсэн байна. Дилав хутагт Б.Жамсранжав Хятадын ерөнхийлөгч Чай Кай Ши-гийн дэргэд 6 жил зөвлөх хийхдээ 1946 онд Монгол улсын тусгаар тогтнолыг хүлээн зөвшөөрүүлсэн түүхэн гавъяатай. Хилс хэрэгт буруутгагдсан тэрээр нутагтаа эргэн ирэхийг оролдсон ч тухай бүр бүтэлгүйтэж байсан учир өөрийн найз, АНУ-ын монголч эрдэмтэн О.Латтиморын санаачлагаар АНУ-ын Нью-Йорк хотын Нью Жерсид амьдрах болсон байна. Нью Жерсид амьдрах хугацаандаа тэрээр АНУ-д амьдарч буй Халимаг иргэдийг цуглуулан оюун санааны хувьд удирдан чиглүүлж, анхны буддын сумыг байгуулалцаж байв. 1961 онд Монгол улс НҮБ-д элсэхэд түүний оруулсан хувь нэмэр тун их юм. 1964 онд Монгол улс АНУ-д элчин сайдын яамаа нээхэд тэрээр бараг орой бүр тэнд ирж хашаан дотор тоглож буй монгол хүүхдүүдийг харан нулимс дуслуулж суусан гэдэг. Цагийн эрхээр буруугүй буруутан болж нутагтаа эргэн очих эрхгүй болж хэлмэгдсэн түүний зүрх монголын төлөө цохилсоор 1965 оны 04-р сарын 08-ны өдөр 82 насандаа жанч халсан байна. Түүний ээдрээтэй амьдралын түүх эргэх цагийн аясад улам бүр тодорсоор байна.
Холбоо барих: 976-88117805, 976-99851211,95864824 Цахим хаяг:burmaa@arigumedia.mn